O Consello da Xunta autorizou a Consellería de Política Territorial, Obras Públicas e Transportes a acometer obras de reestruturación e reparación integral da ponte da Illa de Arousa, por un importe total de 14 millóns de euros. O plan de reestruturación da ponte consiste nun reacondicionamento da plataforma actual de xeito que, ademais dos dous carrís para vehículos agora existentes, se incorporen zonas para peóns e ciclistas.
O obxectivo desta actuación é dotar esta infraestrutura de comunicación entre A Illa de Arousa e a península dun tratamento axeitado aos parámetros de seguridade viaria sen minguar, en ningún caso, a súa capacidade actual nin a súa funcionalidade.
Ademais da reestruturación da plataforma, o proxecto da Consellería de Política Territorial abrangue tamén unha actuación específica para a conservación e reparación dos elementos construtivos da ponte.
Os traballos proxectados denomínanse en termos de enxeñaría unha “posta a cero”, en termos de durabilidade e capacidade para 50 anos. É dicir, a estrutura acadará un nivel de saneamento como se se acabase de construír agora, sen menoscabo de manter a inspección periódica específica a que se someten as pontes de forma regular para garantir o seu perfecto estado.
As actuacións previstas na ponte da Illa de Arousa que teñen carácter preventivo forman parte do programa específico de supervisión de todas as pontes e estruturas de paso que existen nas estradas de titularidade autonómica, posto en marcha por primeira vez este ano pola Consellería de Política Territorial. Este programa abrangue a catalogación, descrición e avaliación do estado de conservación de todas estas infraestruturas, así como as medidas a curto, medio e longo prazo que deben ser aplicadas en cada caso.
A raíz da análise realizada na ponte da Illa de Arousa, os técnicos da consellería deseñaron un proxecto específico para esta infraestrutura. Os traballos que se van acometer son a corrección de fisuras no caixón da ponte e o saneamento da armaduras, da zona aérea dos piares, dos estribos e da obra de paso anexa á ponte no lado do continente. Tamén se pintarán todas as superficies exteriores do taboleiro, dos estribos e das pilas cunha pintura impermeable á auga exterior pero que permite drenar o vapor de auga interior, e substituiranse todos os aparellos de apoio que estean deteriorados.
