Fernando Franco asegura que “é difícil calcular as cantidades totais de perdas debidas á elevada temperatura da auga, pero o que si é certo é que sempre afecta con máis virulencia á ameixa fina”.

As características e particularidades desta modalidade tan común nos parques de cultivo carrilexos fan dela unha vítima propiciatoria no verán.

Non obstante, o patrón maior de Santiago Apóstol destaca que, “aínda que en menor medida, tamén afecta a outras especies, sobre todo á ameixa xapónica”.

Fernando Franco recoñece a preocupación do sector marisqueiro carrilexo ante unha situación que se repite ciclicamente e que, de momento, non ten visos de solucionarse.

A esperanza de parquistas e mariscadoras radica nas investigacións que nos últimos tempos están a levar nos laboratorios da Xunta de Galicia. Fernando Franco lembra que “ata o momento non coñecemos se hai algún avance, pero confiamos en que así sexa”.

Mentres a ciencia non atopa solucións para este preocupante problema para os bancos carrilexos, o sector marisqueiro, maioritario na localidade vilagarciana, segue a padecer a perda de boa parte da súa riqueza.

Obviamente, estas incidencias non perxudicarán á Festa da Ameixa xa que a organización xa prevía esta situación e ademais a ameixa fina non é empregada nesta celebración.