O alcalde José Antonio Cacabelos quixo reforzar esta posición, asegurando que “cando os tempos son difíciles, é cando máis importante é estar unidos”. Cacabelos asegurou que polo Concello non haberá reservas á hora de dar apoio aos empresarios e comerciantes, “ que son grandes dinamizadores sociais”.

Pola súa parte, a edil de Mercados, Victoria Canoura, animou aos veciños a mercar no Grove “porque detrás de cada mostrador hai un grande profesional” e ademais evítanse os atascos característicos das cidades e das grandes superficies comerciais, especialmente nestas datas.

Alicientes > Co obxetivo de facilitar as compras, instalarase unha ludoteca durante o período máis intenso de actividade comercial.

Os pais e nais que o desexen poderán confiar os seus fillos a este servizo entre o 22 de decembro e o 5 de xaneiro, de 11 a 13:30 e de 16:30 a 20:30, para achegarse polos comercios con máis tranquilidade. A ludoteca instalarase na Sala TNT, moi próxima á zona comercial da rúa Castelao.

Ademais, Vázquez tamén anunciou a instalación dun rastrillo benéfico, organizado en colaboración con Érguete-O Grove e Cárita, que se celebrará entre Nadal e fin de ano, co fin de achegar fundos para xente necesitada.

O rastrillo incorporará produtos en stock dos comerciantes e instalarase no tramo da rúa Castelao máis próximo á Toxa, co ánimo de achegar a xente e revitalizalo xa que se considera que perdeu pulo comercial.