O Gran Hotel quere recuperar os balnearios “con prescrición médica”
REDACCIÓN > O GROVE
 |
| O Gran Hotel aposta por recuperar o turismo de saúde |
O Gran Hotel de A Toxa lanzaou onte a nova área médica do seu balneario, denominada “Hesperia Thermal Clinic” e baseada nas propiedades mineromedicinais das augas e dos fangos, nomeadamente dos peloides.Segundo explicou o director do centenario establecemento hosteleiro, Ramón Braña, trátase de recuperar a vertente terapéutica dos balnearios, hoxe algo difuminada ante a proliferación de Spas, que usan auga corrente, e de Talasos, que usan auga do mar. A táctica do hotel é promocionar as características específicas do balneario -que conta con augas mineromedicinais- e así diferenciarse dentro do mercado, no que cada vez ten máis peso o sector da saúde, por medio dos recursos cos que conta, como o ambiente de relaxación, as sales, as algas e os peloides. Ademais, Braña tamén considera que a área servirá para chegar a novos segmentos de mercado, preocupados pola prevención e pola saúde, descartando a imaxe tópica dos balnearios reservados só para xente maior. Na Toxa poderase acceder a seis programas terapéuticos, de entre tres e dez noites: de relaxación e control de saúde, de adelgazamento, reumatolóxico, anti-tabaco, de lesións musculares e recuperación funcional e o dermatolóxico. Para encetar e impulsar a nova etapa do balneario, o Hotel incorporou a unha nova directora médica, Marta Arribas, especializada en hidroloxía, quen fixo fincapé no apoio médico e asesoramento externo, mesmo personalizado, que recibirán os clientes, ademais da posibilidade de beneficiarse da terapia de peloide. Tal e como explicou onte a experta Rosa Meijide, A Toxa convírtese no primeiro balneario do norte do Estado que elabora o seu propio peloide, desenvolvido pola doutora en Farmacia Lourdes Mourelle. Este fango termal está considerado como un medicamento natural con accións analséxicas e antiinflamatorias. Aínda que o peloide foi utilizado desde a antigüidade como elemento terapéutico, aínda non é un recurso moi habitual no noso país, ao contrario do que sucede en Francia, Italia e outros países europeos, onde se preparan de forma tradicional. Hoxe en día a grande novidade radica no seu proceso de deseño e elaboración, beneficiado grazas á implicación de numerosos investigadores, entre eles moitos das universidades galegas. Por último, o Hotel ten previsto aprofundar nesta dirección ligada á saúde e lanzar una liña de cosmética propia para o verán do vindeiro ano, baseada exclusivamente nos fangos e nas augas captadas nos seus pozos.
|
