O SALNÉS-Os actos das Letras na comarca comezan hoxe en Vilanova

Os actos de celebración das Letras Galegas arrancarán hoxe na comarca cos programados polo Concello de Vilanova. Será na casa de cultura de O Esteiro, a partires das 17:30 horas coa sesión de contacontos “O Dragón Comemedo”, a cargo do ilustrador e creador Antón Romero Ces. A actividade completarase cunha proxección de imaxes de ilustracións súas.
Concluida esta proposta, o autor impartirá uns obradoiros de debuxo para que os rapaces asistentes poidan perfeccionar a súa técnica.
Dende o Concello de Vilanova animan a todas as familias a participar na cita.
Os actos das Letras Galegas continuarán xa no propio venres en O Salnés.
No Campo da Feira de O Mosteiro, Meis, a Agrupación Folclórica de O Trevo organizará a I Xuntanza das Letras, con actividades durante todo o día, xantar de confraternidade e o reparto de obras poéticas de Mario Gallego.
En Meaño, ao mediodía, a casa de cultura de Padrenda acollerá a homenaxe a Eugenio Padín, “O Cego de Padrenda”, un acto promovido polo Concello para recordar a súa figura, co descubremento dun relevo na súa honra.
En A Illa de Arousa, a partires das 11 da mañá, o entorno do porto de O Xufre e paseo de O Cantiño acollerá os actos centrais da Asociación Dorna e Concello.
Volverá a acostumada botadura das embarcacións tradicionais. A bordo dunha delas, o “Rei do Mar”, o actor e monologuista Carlos Blanco lerá o artigo que Roberto Vidal Bolaño, o homenaxeado das Letras deste ano, publicara no seu día na revista cultural de Dorna. Unha singladura marítima e música popular porán o broche ao evento.