Viernes 24.05.2019

Viajes InterRías inclúe a ruta “Vigo Pesqueiro” de Fundamar no seu catálogo de servizos

O operador asina un convenio coa entidade para aumentar o número de visitantes ao porto de Vigo 

O presidente de Fundamar, Javier Touza, e o director de Grandes Contas de Viajes InterRías, Enrique Lorenzo  | cedida
O presidente de Fundamar, Javier Touza, e o director de Grandes Contas de Viajes InterRías, Enrique Lorenzo | cedida

A Fundación para a Pesca e o Marisqueo (Fundamar) e Viajes InterRías firmaron onte un convenio de colaboración que pretende multiplicar as visitas turísticas ao Porto de Vigo a través da inclusión do programa “Vigo Pesqueiro” na oferta de servizos do principal turoperador de grupos e circuítos de España.

O presidente de Fundamar, Javier Touza, e o director de Grandes Contas de Viajes InterRías, Enrique Lorenzo, foron os encargados de subscribir o acordo mediante o cal se impulsará o turismo mariñeiro no Porto de Vigo. Viajes InterRías comprométese a promover a visita de grupos de turistas para coñecer de primeira man as instalacións portuarias e as actividades que se desenvolven nelas.

Touza destacou que “esta ruta permítenos achegar aos viaxeiros a unha industria, aos seus produtos, á historia e ao traballo de moitas persoas que dedican e dedicaron a súa vida ao mar, un traballo duro que estendeu o nome de Vigo e as súas empresas por todo o mundo”. Pola súa banda, Lorenzo engadiu que este convenio “amplía o noso catálogo de servizos e oferta aos nosos clientes un novo exemplo de turismo experiencial que contribúe tamén á desestacionalización do sector”. Ademais dunha ruta a pé polo casco vello da cidade olívica, os turistas que contraten esta experiencia visitarán as instalacións portuarias (a lonxa, viveiros de mariscos, un buque pesqueiro, etc.). Posteriormente desprazaranse en autobús ata a Vila Mariñeira de Bouzas, pasando polos estaleiros da emblemática Avenida de Beiramar, coñecendo o traballo e a industria que neles se desenvolve. 

Fundamar está composta pola Cooperativa de Armadores de Pesca do Porto de Vigo (ARVI) e os sindicatos UXT e CCOO, que conforman a maioría da representación no ámbito social e económico da pesca marítima e o marisqueo dentro da comunidade autónoma.

Comentarios