Detectan unha fraude de 158.000 litros de gasolina subvencionada en Arousa

O Servizo Marítimo da Garda Civil e a Axencia Tributaria detectaron unha fraude de 158.000 litros de gasolina subvencionada en embarcacións na Ría de Arousa. A investigación iniciouse no marco das pescudas encamiñadas á detección de tráfico de drogas e durante estas xestións púidose observar como os tripulantes de varias naves desembarcaban garrafas a terra, e transportábanas nos seus vehículos particulares.

Tras observar estes feitos, os axentes procederon a organizar numerosos controis operativos, para detectar unha fraude na gasolina. Os resultados das primeiras investigacións deron un resultado positivo, o que levou ao corpo a ampliar a vixilancia.

Controis en terra
Os axentes da Garda Civil ampliaron entón os controis a terra firme, e establecéronse nas principais gasolineiras da Ría de Arousa, tanto en A Coruña como en Pontevedra. Así puideron observar que o volume de embarcacións que enchían e sacaban as garrafas dos seus vehículos era bastante superior ao que se prevía aos inicios da investigación.

Para calcular a defraudación, ademais da vixilancia dos axentes, realizouse un complexo estudo documental sobre os datos nas embarcacións sobre as que recaía a sospeita, contrastados con informes de Capitanía Marítima sobre as capacidades dos depósitos que tiñan autorizados.
Tras o cruce de todos os datos obtidos, litros que se encheron e capacidade do depósito, realizouse un cálculo da cantidade de combustible que un total de oitenta e seis embarcacións realizaron fóra dos seus depósitos. deducíndose unha cantidade estimada de 158.000 litros só en Arousa.

Unha viaxe ata Colombia
Como exemplo da defraudación que se puido levar a cabo, só unha embarcación puido chegar a encher ata 7.672 litros en exceso, o cal supón que, levando o tipo de motor que posúe a toda velocidade, podería saír desde Galicia a Colombia e retornar, repetindo a viaxe de oito mil millas cada traxecto, segundo explican desde o Ministerio de Interior nun comunicado conxunto.

En calquera caso, e segundo matiza a Garda Civil, os 7.672 son a cantidade mínima defraudada, pois chegaría a ser maior pero imposible de cuantificar con exactitude debido a que se descartaron os movementos inferiores ou iguais aos depósitos autorizados nas embarcacións investigadas conxuntamente polo instituto armado e a Axencia Tributaria.

Asemade, dende Interior sinalan que hai que ter en conta que, a diferenza do gasóleo, a gasolina non posúe trazadores que poidan permitir a súa detección no uso fraudulento fóra dos medios que teñen dereito á súa utilización, o que permite o seu uso en automóbiles privados ou outros vehículos sen dereito á bonificación.

O Servizo Marítimo da Garda Civil e a Axencia Tributaria detectaron un total de 86 embarcacións infractoras, que recibirán a correspondente notificación por infración da Lei de Impostos Especiais. A investigación levouse a cabo durante meses nos municipios do norte e do sur da Ría de Arousa. As investigacións que permitiron detectar esta fraude iniciáronse no marco dun operativo contra o tráfico de drogas na Ría de Arousa. Agora, os titulares de máis de oito decenas de embarcacións terán que responder ante o Ministerio de Facenda.