Escola e Banda poñen a música aos contos máis emblemáticos na rúa Castelao

Os alumnos da Escola de Música e os membros da Banda Municipal inauguran mañá a partir das nove da noite os concertos de “contos musicados” unha iniciativa enxeñosa que ten como principais destinatarios aos máis pequenos da casa. A primeira das pezas que será teatralizada para os nenos é a de “Xián e Antía” que, coma todas as actuacións deste tipo, tomarán como escenario as inmediacións da rúa Castelao.
A de “Xián e Antía” non é a única historia que os nenos terán a oportunidade de ver en vivo e en directo. A Banda de Música será a encargada de interpretar o día 1 de agosto dúas pezas emblemáticas: “El Quijote” e “El pequeño Rugier”. Esta mesma formación ofrecerá o día 14, en plenas festas de San Roque, o terceiro concerto, “Los músicos de Bremen”, orixinal de Angelo Sormani, pero nesta ocasión o escenario elixido é a rúa Rey Daviña.
Non é a primeira vez que ambas formacións musicais poñen en escea contos tradicionais. Un dos máis aplaudidos dos últimos meses foi “El gato con botas”, interpretado polos alumnos da Escola de Música “Bernardo del Río” e que contou cunha gran aceptación por parte do público. Aproveitando que os nenos están de vacacións e que o mes de agosto é o elixido polos turistas para achegarse ata Vilagarcía, a concellería de Educación que dirixe Rocío Llovo considerou que esta era una boa fórmula para achegar o mundo da música aos máis pequenos cun espectáculo pensado non só para eles, senón para toda a familia. Ao mesmo tempo que se pon en marcha unha actividade lúdica tamén se dan a coñecer as formacións que se imparten tanto na Escola como na Banda.