Estes días as noticias relacionadas co mar non son nada boas. Así ademais do achádego das primeiras vítimas do naufraxio do Rua Mar, no sur da Península, hai que engadir a localización do cadáver de Suso Nogueira Mouriño, un veciño moi distiguido e especial de Corón e director da Banda de Música Cultural de Vilanova de Arousa, é unha mostra máis de que ninguén sabe cando lle chega a súa hora e que moitas veces vanse antes de tempo os mellores.
Suso Nogueira deixa unha pegada indeleble non so entre os seus veciños de Corón e de Vilanova de Arousa senón en toda a comarca e, sobre todo, nos ambientes musicais da provincia de Pontevedra onde coñecían o seu talante e profesionalidade ao fronte da Banda de Música Cultural.
Hai moitos xeitos de facer patria e de reivindicar no día a día o orgullo que sentía por Vilanova e por toda a comarca de Arousa. El facíao desde a música levando o nome do seu pobo, do seu concello polo mundo adiante e sempre coa batuta ergueita a modo de faro inspirador como director dos seus compañeiros músicos.
O labor de persoas como Suso Nogueira deberían ser motivo de homenaxe (el recibiu o seu ofrecido polo Concello de Vilanova no ano 2013) e respecto continuo por parte de toda a sociedade. Eles, os músicos, co seu traballo e o seu esforzo son quen de reivindica-la cultura de a pé, e non so me refiro aos paseíllos que fan por canta corredoira hai para cumprimenta-los compromisos das comisións de festas levando a alegría e as gañas de divertirse polas grandes vilas e cidades, tamén polos pequenos pobos e aldeas que unha vez ao ano teñen, grazas a persoas como Suso, acceso á música de calidade e en directo, senón porque co seu esforzo e adicación manteñen vivas as tradicións e a cultura popular con maiúsculas.
Hoxe Corón, Vilanova e Arousa enteira están de loito e choran polo tráxico falecemento de Suso Nogueira, pero para todos nós seguirá vivo o recordo dun home que sempre lle foi leal ao mar e a nosa Ría e que soubo levar a música no seu corazón ata pobos tan remotos do interior da provincia de Pontevedra con alegría e satisfacción propias do mellor profesional. A súa imaxe de home cercano e campechano sempre foi marca da casa e alá onde vaia seguro que abrirá a marcha dirixindo con elegancia e paso marcial aos músicos de ben entonando un pasodobre dos de antes, dos de sempre, dos de toda a vida, ou non?