DE GUERRAS E ESPERANZAS

O mundo espertou coa incómoda e terrible sensación de que algo está a punto de suceder, e de que países, Organizacións Internacionais e Alianzas de diversos intereses, non son quen (unha vez máis) de frear a escalada que conduce, directamente, a un conflito armado. Intereses estratéxicos, económicos, políticos ou étnicos, engaden  pólvora a unha situación xa de por si conflitiva.
Semella un novo episodio da Guerra Fría. Daquel mundo que xiraba en torno a dous eixos antagónicos: Estados Unidos e Unión Soviética. Hoxe un novo enfrontamento, con Rusia de por medio, pon ao borde da guerra civil un territorio, Crimea, e un país, Ucrania. Unha situación dramática, na que a Unión Europea case non ten nin unha soa frase de texto no guión. Somos a referencia territorial, pero o poder e a influencia residen noutras latitudes. Os interlocutores son outros, non a UE. Unha vez controlados os puntos claves da capital, polos prorrusos  e por un exército sen insignias, o Parlamento de Crimea aproba unirse a Rusia. Rusia decide despregar tropas en Crimea. Ucraína protesta e os EEUU ameazan. Un efecto dominó incontrolado e letal.
No Sur, xeográfico e económico, reivindicado por Benedetti, a fronteira entre ricos e pobres é cada vez máis difícil de defender. As últimas traxedias de perder a vida para gañar dignidade, demostran que non hai alturas que poidan frear a fuxida da miseria e da agonía permanente da África Subsahariana. A fame fai posible o imposible. Soñar sempre foi un exercicio libre que fixo grandes aos que nunca se renderon. Somos fronteira Sur para a UE, pero tamén o Norte, a primeira esperanza, para millóns de seres humanos. Final e principio, dúas caras dunha mesma circunstancia tráxica.

DE GUERRAS E ESPERANZAS

Te puede interesar