Dámoslle a volta á expresión “a beneficio de inventario” que, ao tempo de lembrar unha oportunista maneira utilizada no mundo editorial para adaptar ao castelán o título da obra “Sous beneficie d`inventaire” que contén sete ensaios de Marguerite Yourcenar, é unha figura xurídica que consagra o dereito de herdeiros para evitar a recepción de patrimonios con resultado de masa negativa; e dicir, que o recibido polos sucesores sexa inferior á débeda que arrastran os bens que se van herdar. A opción contraria é a aceptación pura e simple; a que leva incluído o prexuízo de inventario que pode resultar desfavorábel. Metáfora dun modelo de xestión política que acepta rescatar con diñeiro público autoestradas nas que mesmo se arrastra débeda coa facenda pública.
Porén, a punto de rematar un ano máis, é tempo de facer inventario dos grandes sucesos políticos, económicos e sociais sen entrar no detalle fino do tendeiro que rexistrará con rigor e minucioso coidado a súa existencia en mercadoría, antes de iniciar a contabilidade dun novo ano que xa está petando á porta. Así, os acontecementos vividos neste mundo planetario poderían resumirse con este ocorrente chío: “O meteorito dos dinosauros, a peste negra, a gripe española e 2016”. É posíbel que sexa algo esaxerado, certo que si, aínda así dá conta retranqueira dun período que marcará un antes e un despois na traxectoria de moitas cousas que xa non volverán a ser como foron antes. Abofé que non. Todo é relativo, claro.
Velaquí un enredo que proba a diferenza de criterio: Un filósofo, un biólogo, un físico e un matemático están a se tomar un albariño nun furancho. Ven a dúas persoas entrar no baño, e un momento despois saen tres. Impresionado, o filósofo di: “Isto que vimos non puido ocorrer. Do Non Ser non pode xurdir o Ser, porque o Non Ser non é, e o Ser é”. O biólogo mírao e di: “Non me veñas con parvadas metafísicas. Está claro que se produciu algún tipo de reprodución dentro do baño”. O físico afirma entón: “Iso si que é unha saída de ton. É evidente que a terceira persoa é un ser virtual, produto dunha flutuación cuántica do baleiro. Non vos preocupedes, que non durará moito”. Despois dun longo silencio fala o matemático: “A verdade é que non entendo a discusión. Só temos que esperar a que entre outra persoa ao baño. Entón quedará baleiro”.
Cada quen fala da feira con lle foi nela ou irá. Inventario negativo ou positivo en 2017?. Chi lo sa.