7º-16º
lunes | 29 abril | 2024
A rede viaria de Galicia incrementouse de forma notable nos últimos anos, nos que se fixeron máis patentes, tamén, os efectos do cambio climático e a necesidade de esfozarse en manter as estradas en boas condicións para reducir os riscos. Nese contexto, o Goberno galego vai destinar o vindeiro ano un 8% máis de investimento á conservación e mellora da rede.
A Xunta vén defendendo que para acadar unha rede viaria segura e eficiente, tan estratéxica é a construción de novas estradas como o mantemento das vías existentes mediante os traballos de conservación precisos. E por iso, ademais de reivindicar con insistencia un plan de conservación para as vías do Estado en Galicia, como a A-6, tamén se aplica nas estradas da súa competencia.
Así, para manter as vías da súa titularidade nas mellores condicións e garantir a seguridade viaria aos usuarios e comodidade nos seus desprazamentos, o Executivo autonómico incrementará no vindeiro exercicio o orzamento destinado a este fin, con partidas que acadan os case 53 millóns de euros. Este investimento posibilitará continuar con programas como o Plan de reforzos de firme, a conservación ordinaria e a vialidade invernal ou o programa de control de pontes, obras de paso, muros e noiros.
A Xunta lembra como, nos peores anos da crise económica, blindou a conservación de estradas, de modo que se mantivesen os alicerces para a recuperación económica. Nos anos da pandemia, esta decisión revelouse axeitada, dado o servizo esencial que supón asegurar a mobilidade as 24 horas de todos os días do ano.
Esta aposta do Goberno galego por manter o estado das estradas autonómicas nas debidas condicións de viabilidade, seguridade, limpeza, sinalización e comodidade tivo, cada ano durante os últimos exercicios, o seu correspondente reflexo nas contas autonómicas. No vindeiro 2024 non só se mantén esta tendencia, senón que nos Orzamentos da Consellería de Infraestruturas e Mobilidade as partidas destinadas á conservación das vías teñen un importante protagonismo.
De feito, os preto de 53 millóns de euros que se dedican a esta materia constitúen o investimento máis algo en materia de conservación e mantemento da rede viaria nos últimos dez anos, experimentando un aumento do 30% desde 2017.
No vindeiro exercicio mantéñense as contías para tarefas fundamentais como a conservación ordinaria e a vialidade invernal, con 26,6 millóns de euros de investimentos. De feito, como cada ano por estas datas, entre o 1 e o 15 de novembro, a Xunta activa o Plan de vialidade invernal nas vías autonómicas das catro provinciais para garantir a seguridade ante as inclemencias do tempo, como a neve ou as placas de xeo nas estradas. Este plan mantense activo todos os anos nas catro provincias ata o 30 de abril.
O plan de reforzos de firme vai gañando cada vez máis relevancia
Outras liñas de actuación, como o Plan de reforzos de firme, van gañando cada vez máis relevancia. Esta medida superará o vindeiro ano os 17 millóns de euros. Nos últimos seis anos a Xunta leva licitado obras en materia de reforzos de firme que superan os 115 millóns de euros. Ademais, en 2024 vaise actuar tamén no firme da autovía do Barbanza, igual que se renovou o da autovía Santiago-Brión en 2023.
Executarase, tamén, unha actuación para completar a renovación integral do firme da autovía AG-53, entre Dozón e a A-52, estratéxica paras as comunicacións entre a capital de Galicia e Ourense.
No vindeiro exercicio destacan, así mesmo, as partidas específicas destinadas á xestión e control de pontes e obras de paso, muros e noiros das estradas autonómicas. Cómpre lembrar que a Xunta activou un programa pioneiro de xestión de pontes e obras de paso para avaliar o estado de conservación destas estruturas e asegurar o nivel de prestacións e a seguridade dos usuarios. A boa experiencia e resultado desta iniciativa levou ao Executivo autonómico a estendela á inspección de noiros e muros co obxectivo de avaliar a conservación dos sistemas de contención das estradas.
Así, nos últimos anos, a Xunta vén realizando un seguimento continuo do estado das pontes, viadutos, muros e noiros, do que se derivan actuacións de rehabilitación en caso de ser necesarias. Esta medida está a ser unha ferramenta de grande axuda tendo en conta a orografía, a topografía e a climatoloxía da comunidade. A Xunta destinará en 2024 a este fin máis de 6 millóns.
A Xunta tamén continuará, a través da colaboración con Seaga, co control da biomasa, cun contrato vixente que supón un investimento de case tres millóns de euros en dous anos.
Francisco Menéndez | “O que buscamos é ter unha diagnose precisa das necesidades para actuar” |
O director da Axencia Galega de Infraestructuras, Francisco Menéndez, sinala que en Galicia temos unha serie de vantaxes e dificultades con respecto a outros lugares no tocante ás estradas.
|
