O BNG conmemora este ano o seu 40 aniversario e tras un acto principal celebrado o pasado setembro, no mesmo día e lugar onde naceu, o coruñés frontón de Riazor, está festexándoo nas diferentes comarcas. Onte tocoulle ao Salnés coa homenaxe a 15 militantes históricos que co seu compromiso e traballo levaron á formación ao lugar que ocupa hoxe.
Os actos tiveron lugar no salón de Peña de Cambados e os nomes propios da xornada foron: Albino Caneda (Sanxenxo); Óscar Fariña, Adela Leiro, Mon Daporta, Pastora Pillado, Xoán Antonio Pillado –estivo no primeiro consello nacional–, Xose Henrique García e Duarte Correa (Cambados); Raúl González, Rosa Abuín e Xoán Xosé Bouzas, Tupi, (Vilagarcía) e Rosa Domínguez, Alfredo Fernández e Xosé Manuel Pérez Dadín (O Grove). Precisamente este grovense interviu no nome de todos eles, que recibieron diversos agasallos conmemorativos e un moi especial e sorpresa: un zoco de ferro simbolizando o seu apego á terra a través deste proxecto político. O voceiro municipal e candidato cambadés, Liso González, explicou que nestas persoas queren “reflectir tamén aos simpatizantes e colaboradores de todos estes anos, amosar o valor que teñen para nós. Somos unha organización de base”.
González foi un dos participantes que interveu xunto á deputada no Parlamento Galego e membro do Consello Nacional, Montse Prado, así como Manuel Anxo Fernández Baz, que presentou o libro “40 anos ao servizo de Galiza. BNG. 1982-2022”. A publicación recolle os acontecementos máis destacados da formación nacionalista e inclúe máis de 400 fotografías, algunhas delas inéditas.