onsumo gusto, en galego. Velaquí un lema que ben podería empregarse en dúas amábeis campañas a favor do uso da nosa lingua que están a desenvolverse arreo do país, petando na responsabilidade que afecta ás institucións públicas no proceso de normalización do idioma; e tamén polo que atinxe ao compromiso individual que facilita esta labor na vida cotiá. Nun dos casos, trátase do pedimento que se fai á Xunta de Galicia para que asuma o financiamento, ben barato por certo a respecto doutros que se fan habitualmente, de xeito que como sucede nos casos vasco e catalá, os filmes e series que ofertan as plataformas de televisión dixital sexan dobradas ao galego ou leven subtítulos e lenda na lingua galega. Para iso, da iniciativa da Asociación Galega de Profesionais da Tradución e da Interpretación, en parcería coa Mesa pola Normalización Lingüística e máis APRADOGA, a Asociación de profesionais da rama artística de dobraxe de Galicia, convidan a subscribir un pedimento ao Goberno Galego para que este acorde formalizar o acordo que lle ofrece unha das canles de máis grande número de cliente usuarios para o que demandan menos de sesenta e dous mil euros anuais, nun convenio a tres anos, que resultan difícil de asumir, e menos de entender, que non se teña realizado xa con anterioridade.
Lémbrese que, por mandado legal da Lei de Normalización Lingüística, establécese pada o poder político galego a obriga de “fomentar a produción, a dobraxe, a promoción dos subtítulos e a exhibición de películas e outros medios audiovisuais en lingua galega”. Certo é que, na practica, cada ano vén a reducirse máis a dotación orzamentaria para a dobraxe coa mágoa de non atopar, no mercado audiovisual, filmes que teñan versión na lingua do pais para súa escolla e selección.
Resultando un práctica, cada vez máis estendida aínda que condicionada polo momento económico soportan as e os traballadores ou ás sociedades mercantís, neste tempo que precede ás Festas de Nadal son frecuentes os xantares e ceas de “empresa”; e dicir, o momento de xuntar ás persoas que forman o cadro de persoal arredor dun menú que é, tamén, ocasión para que se potencie outra das campañas a favor do galego; neste caso convidando ao consumo de produtos que teñan a súa etiquetaxe na lingua galega. Produtos da terra, do sector agroalimentario galego que ten demostrado estar ao máis alto nivel respecto da calidade e seguridade alimentaria dos produtos que ofrece no mercado. Un consumo que potencia a nosa economía e garante postos de traballo aquí, entre nós. Iso é o que nos propoñen dúas entidades que forman o proxecto de “Galeguizar Galiza”; e dicir, o Foro Enrique Peinador e máis o IEGADE.
Cando temos opción de escoller, podemos optar por aqueles produtos galegos que ademais utilizan unha lingua que queremos manter viva. En galego, consumo gusto. Faltaría máis.