Concepción Pombo foi elixida este martes como nova directora xeral da Corporación de Servizos Audiovisuais de Galicia (CSAG), anteriormente CRTVG, polo Pleno do Parlamento galego, cos únicos votos a favor do grupo maioritario do PPdeG.

Foron necesarias tres votacións ao longo das últimas semanas en plenos distintos da Cámara autonómica para que finalmente Pombo poida acceder a este cargo, ao que chega en substitución de Alfonso Sánchez Izquierdo, que exerceu esta responsabilidade durante máis de 16 anos.

A falta de consenso sobre a figura do seu substituto terminou provocando que se impulsase unha modificación legal pola que xa non é necesaria unha maioría cualificada de dous terzos en primeira votación ou de tres quintos en segunda votación para esta elección, senón que, despois de dúas votacións previas, basta con maioría simple –que na actualidade ostenta o PP– para a designación.

Intentos anteriores

Así, tras dous intentos anteriores infrutuosos, na xornada deste martes alcanzouse o número de votos suficientes para converter a Concepción Pombo na nova directora xeral da CSAG.

Conclúe así un proceso de renovación do cargo de máxima responsabilidade dos medios públicos galegos que se prolongou por preto de dous meses desde a primeira comparecencia da candidata electa ante a comisión parlamentaria que supervisa a actividade desta corporación.

Pombo chega ao cargo tras varias décadas de traballo dentro da CSAG, na que pasou por varias ocupacións e chegou a exercer a dirección da área de Informativos. Precisamente este aspecto foi un dos máis controvertidos da súa candidatura, xa que os grupos da oposición considérana artífice da suposta parcialidade e manipulación informativa da que adoecen os contidos da radio e a televisión galegas.

Alteración da orde do día

Ao comezo do Pleno, a viceportavoz do BNG, Olalla Rodil, tomou a palabra para solicitar unha alteración da orde do día e a incorporación dunha breve quenda de intervencións dos grupos antes da votación.
“Hoxe (por onte) culmina o dedazo do PP”, sostivo Rodil, que augurou que o nomeamento de Pombo traerá “máis control político e máis manipulación informativa” de aquí en diante.

“O mínimo será que podamos opinar o resto de forzas da Cámara”, defendeu a deputada nacionalista, cuxa proposta, xa abordada na xunta de portavoces previa, foi descartada polo Pleno.

Ao longo de todo este proceso de renovación da dirección xeral da CSAG, os populares reivindicaron a idoneidade de Concepción Pombo para este cargo polo seu amplo coñecemento da corporación, mentres que o resto de grupos rexeitouna frontalmente por considerala unha candidata de parte.