O presidente da Xunta, Alfonso Rueda, aproveitou a entrega das Medallas de Ouro de Galicia aos alcaldes de Oporto, Rui Moreira, e de Braga, Ricardo Rio, para chamar a intensificar a cooperación co foco en mellorar as conexións ferroviarias, entre outras cuestións compartidas e para deixar unha mensaxe política: “a mellor vacina contra os extremismos é a política que aposta pola fraternidade, a seriedade na xestión e a procura dun propósito compartido”.

“Tanto España como Portugal sufrimos nos últimos anos as tempestades da inestabilidade ou do descrédito da política. Cando as certezas e a seguridade deixan paso aos escándalos e á política do caneo curto, créase un terreo fértil para os extremismos, que prometen unha Arcadia feliz na que aos propios perténcelles todo e aos alleos non lles corresponde nada”, sentenciou o mandatario autonómico.

Ante numerosas autoridades e membros destacados da sociedade civil, Rueda subliñou que, quen solicita a confianza dos cidadáns “baseándose na división e na polarización” é “porque sabe que nunca merecerá a confianza dun pobo unido e esperanzado”. Por iso, avogou por apostar pola “fraternidade” como “mellor vacina” fronte aos extremismos.

"Boa política"

“Esa boa política é a que encarnan Ricardo Rio e Rui Moreira. Nin buscan nin necesitan fracturar Braga e Oporto porque a división é o oposto da fortaleza e eles dirixen cidades fortes, optimistas e ambiciosas”, remarcou o xefe do Executivo galego.

Rio e Moreira, que este ano deixan o seu cargo ao alcanzar o período máximo de mandato que fixa a normativa portuguesa, sumáronse a Leonor de Borbón Ortiz , princesa de Asturias, que tamén recibiu este ano a Medalla de Galicia, a máxima distinción que concede a comunidade galega e que a heredeira da Coroa xa recolleu a mediados de mes.

Moreira e Rio, recibiron as Medallas de Ouro de Galicia polo seu espírito de cooperación entre a comunidade e o norte de Portugal, unha relación que ambos enalteceron e que debe continuar con “máis investimentos” e conexións en transportes como a Alta Velocidade. 

Os rexedores lusos únense este ano á princesa Leonor de Borbón como merecedores da condecoración

“É moi gratificante recibir esta condecoración por axudar a reforzar a relación transfronteiriza entre o Norte de Portugal e Galicia. A cooperación entre as dúas rexións é un tema que me apaixona e ao que dediquei moita atención como alcalde e cidadán”, expresou Rui Moreira.

Asegurou que “en ningunha zona fronteiriza entre Portugal e España existen conexións tan profundas”, polo que é “importante aproveitar a especial relación” que existe entre os dous territorios. Ademais, declarou que as eurorrexións son “fundamentais” para “a cohesión rexional da UE” e teñen “maior capacidade de atraer financiamento europeo”.

Pola súa banda, Ricardo Rio afirmou que era unha honra para el, para a súa cidade e para o seu país recibir a medalla, que é “testemuño dunha relación de proximidade” entre Galicia e o Norte de Portugal. “Galicia é tamén a nosa casa e por iso esta medalla ten un valor moi especial”, expresou.

Así mesmo, o que fose presidente de Eixo Atlántico en varios períodos destacou as “políticas inspiradoras en materia de mobilidade de Pontevedra, as estratexias de desenvolvemento económico da Coruña ou as iniciativas de intercambio cultural como Lugo ou Monforte de Lemos”.

 “Traballamos para construír unha axenda urbana común, políticas de sustentabilidade e para mirar á cuestión demográfica e o desenvolvemento social”, agregou. 

Rueda asegurou que se outorga esta distinción a dous alcaldes dunha terra “irmá”, para a que “nunca houbo unha fronteira, senón máis ben unha raia”.