A localidade de A Illa de Arousa estrea unha nova tempada máis o ciclo das súas festas gastronómicas con produtos do mar. A primeira arrincou hoxe na tradicional ubicación do paseo marítimo do Cantiño. Trátase da XVIII Festa da Exaltación da Navalla, que organiza o Club Baloncesto Dorna e que aproveita o tirón desta ponte festiva para ofrecer catro xornadas de mariscadas, a pé de mar, nas que se prevé unha intensa asistencia de visitantes e turistas.  

A venda de pratos comezou xa, neste mediodía, e regresará á noitiña. A organización fixo provisión duns 900 quilos só do produto estrela, a navalla. A ración, que inclúe unha ducia de unidades, véndese a un prezo de 14,50 euros. Aínda que tamén será posible, como en todo este ciclo de festas, mercar outros pratos nos que diferentes mariscos comparen protagonismo. Así, non faltan os demandados mexillóns tigre, paella de marisco, croquetas, empanada e tamén tortilla e pementos de Padrón. Para o postre hai filloas caseiras. O recadado contribuirá á financiación da actividade deportiva do club.