Un enxeñeiro industrial e o fundador dunha marca de moda sostible foron os relatores da actividade que acolleu esta semana o Centro Público Integrado de Atios, en Valdoviño, no marco de Mocidade polo Clima. Programa da Consellería de Medio Ambiente e Cambio Climático, a súa titular, Ángeles Vázquez, foi a encargada de clausurar a xornada.

Botando a vista atrás, no seu primeiro curso de vida, o 2024-25, xa son máis de 14.000 as rapazas e rapaces que participaron nas diferentes accións postas en marcha baixo o paraugas de Mocidade polo Clima desde o pasado mes de novembro. Para o final do verán, agárdase que sexan case 20.000. Unha cifra que supera as primeiras estimacións que se manexaban na Consellería, e que dan unha medida do seu éxito.

Mocidade polo Clima é unha iniciativa transversal e pioneira que aspira a formar, informar e animar a actuar fronte ao cambio climático a galegas e galegos con idades comprendidas entre os 3 e os 35 anos. Trátase dunha das principais novidades incluídas no II Plan rexional integrado de enerxía e clima 2024-2030 (PRIEC), a folla de ruta que dirixirá as liñas de acción do Goberno galego a medio prazo para avanzar cara ao obxectivo de acadar a neutralidade climática no horizonte do ano 2040.

Mocidade polo clima artéllase como unha estratexia integral dividida en tres eixos de actuación complementarios: formación desde a etapa de Educación Infantil ata a universidade; información e divulgación canalizada a través de visitas e eventos con relatores de referencia na materia; e acción pola vía do fomento da participación activa e o compromiso entre a mocidade.

Os premios mozo polo clima recoñecerán o talento xuvenil na investigación, a cultura e o arte

No eixo formativo, durante o curso 2024-2025 apostouse polos programas MeteoEscolas e Escolas Verdes polo Clima, adaptados a diferentes franxas de idade e enmarcados no Plan Proxecta para o fomento da innovación educativa nos centros escolares galegos. Como é habitual, este curso tamén se desenvolveu o programa de visitas á Rede de observación ambiental, que permite coñecer instalacións de referencia en materia climatolóxica como MeteoGalicia, o Laboratorio de Medio Ambiente ou algunha das estacións de calidade do aire.

En canto á divulgación, destacan as charlas inspiradoras bautizadas como Inspiradores polo clima. Antes de recalar no centro público de Valdoviño, cunha actividade na que participaron 204 alumnos de 1º, 2º, 3º e 4º da ESO, outros inspiradores compartiron as súas experiencias coa rapazada no Liceo La Paz da Coruña, Los Sauces de Pontevedra, o CEE Infanta Elena de Monforte e o Colexio Pablo VI da Rúa.

No caso do CPI Atios, as nenas e nenos puideron escoitar a Coque Alcázar, cofundador da Asociación Slowlight –iniciativa que busca unha iluminación pública sostible e contribuír a reducir a contaminación lumínica; o proxecto, xa a escala internacional, conta con 130 entidades adheridas–; e Óscar Vales, fundador de Vazva e cofundador de We Sustainability –proxecto de concienciación medioambiental, con accións como a limpeza de praias–.

Balance

En retrospectiva, Meteoescolas acadou este curso un récord de participación, con 42 Meteoescolas seleccionadas –recibíronse case o dobre de solicitudes–, onde máis de 10.300 alumnos e 715 docentes aprenderon nocións de meteoroloxía.

No caso das Escolas verdes, participaron más de 1.100 alumnas e alumnos de sete centros o último curso, de tal xeito que, desde 2019, xa son 10.350 as mozas e mozos (ademáis de 677 docentes) os que participaron. E hai que sumar que máis de 2.200 estudantes, de 77 centros, levaron a cabo visitas tanto á sede de MeteoGalicia como á rede de calidade do aire.

O proxecto aspira a formar, informar e animar a actuar fronte ao cambio climático a galegos de 3 a 35 anos

Por último, pero non menos importante, Inspiradores polo Clima chegou a 450 alumnas e alumnos de Secundaria, así como a rapazada de catro centros de educación especial.

Asemade, Mocidade polo clima ten previsto incorporar outras accións, como a primeira edición dos Premios mozo/a polo clima, que servirá para recoñecer o talento xuvenil dándolle visibilidade a iniciativas, proxectos e ideas que xeneren algún impacto climático en Galicia. Haberá premios a mozas e mozos que destaquen nos eidos da investigación, a cultura e o arte, así como no social e o empresarial.

O seguinte paso:  Van polo Clima

Mocidade polo Clima non pecha por vacacións. Este verán, Van polo clima percorrerá algúns dos principais festivais e eventos musicais de Galicia, así como 15 campamentos de ocio e campos de voluntariado organizados polo Goberno autonómico. Trátase dun espazo itinerante que pretende implicar á mocidade na loita contra o cambio climático a través de información, propostas lúdicas e charlas.

O nome procede dunha furgoneta rotulada –con zona anexa de lecer, xogos e photocall– que percorrerá a comunidade os vindeiros meses, despregando actividades lúdicas, participativas e informativas nunha vintena de puntos da xeografía galega. Van polo Clima tivo a súa estrea oficial no Son do Camiño, un dos festivais máis relevantes de todo o país e que acaba de celebrar a súa sexta edición en Santiago de Compostela.

As rapazas e rapaces que se acheguen terán a oportunidade de participar nun concurso de preguntas e respostas –baixo a premisa Que sabes sobre o clima?– con agasallos para os máis atinados. A zona de lecer, con elementos en 3D creados con materiais innovadores e procedentes da economía circular, creará un espazo de escoita activa e participación, mediante charlas inspiradoras a cargo de referentes en diversas materias.