A presidenta da Federación de Salvamento e Socorrismo de Galicia, Nuria Rodríguez, fixo un chamamento á prevención e a concienciación sobre a importancia de seguir as recomendacións en praias e piscinas ante o aumento este verán das imprudencias e tamén de casos de afogamentos, xa non en persoas maiores que sofren unha indisposición senón en máis novas.

Rodríguez recoñece que hai preocupación e máis despois de que Galicia sexa un ano máis unha das rexións con maior número de afogados. 

A autonomía é, un ano máis, unha das zonas españolas con maior número de afogamentos, con 34 no que vai de ano

No que vai de 2025 e, segundo as últimas cifradas publicadas pola Federación Española de Salvamento e Socorrismo, morreron un total de 34, oito en xullo xa sexa en praias, ríos, piscinas e outros espazos acuáticos. 

De feito, a comunidade galega sitúase este ano como a quinta con maior número de mortes por afogamento, só detrás de Andalucía, Canarias, Comunidade Valenciana e Cataluña nun ano no que, a nivel estatal, faleceron 302 persoas afogadas.

"Se poden evitar"

Rodríguez remarcou o feito de que se estean rexistrando cada vez máis casos vinculados a imprudencias “que se poden evitar” e non o dunha persona maior “cun problema cardíaco e ao que non se pode reanimar”. “Este ano é destacable”, lamentou ao aludir a situacións como persoas que se tiran desde unha altura considerable, en zonas que non coñecen e logo non son capaces de saír á superficie.

Aínda que asegurou que normalmente o perfil da persona que se afoga é en Galicia o de alguén de máis de 65 anos, insistíu en casos rexistrados en Pontevedra recentemente. “Unha foi nunha zona prohibida ao baño en Catoira e outro que se tirou a unha poza e xa non saíu á boia, era xente nova”, remarcou.

Por outra banda, subliñou que entre as 12.00 e as 16.00 horas é que cando se produce o maior número de imprudencias e insistíu en que detectan máis en xente nova, aínda que tamén apelou á concienciación de proxenitores que deixan aos seus fillos sós na auga e a idades temperás.

“A xente non é consciente dos perigos que leva o mar e en Galicia vén moita xente de fóra que non sabe que hai correntes e que a marea sobe e baixa a un ritmo importante e ao neno que case non sabe andar déixaselle na auga e non vén a forza que leva o mar”, apuntou.

Máis efectivos

“Falta educación, é importante que se faga caso aos socorristas”, expuxo para reivindicar a importancia de que se estenda a presenza destes profesionais a areais que agora non contan con eles pero tamén en que non se lles vexa como unha figura que está “ao servizo de todos, para limpar, para coller as medusas, para curar gaivotas, auxiliar de baño que axuda á xente maior ou persoas con mobilidade reducida”.

“Iso é o que pensa a xente, venche con moitas funcións”, aseverou para incidir na importancia que teñen os socorristas pero tamén en que se lles faga caso cando advirten de perigos ou comunican prohibicións existentes segundo o estado do mar.

Seguir as normas

“As imprudencias páganse”, apostilou Rodríguez para incidir na importancia de que se se sigan as normas que fixen os carteis ou que non se bañen no mar cando hai bandeira vermella ou se extreme a precaución en caso de permitirse o baño. 

Neste sentido, recalcou que todas as praias deberían ter socorristas e, á marxe do problema de orzamento que apuntan algúns concellos, asegurou que para captar profesionais debería ampliarse o número de meses que traballan. “Onde son tres meses non hai problema, onde son dous ou menos é moi difícil”, aseverou.

Cuestionada se, en xeral, a sinalización é boa, sinalou que hai “de todo”, pero incidíu en que onde non hai servizo de salvamento deben de especificarse ben as normas en carteis. “E que a xente aprenda a chamar ao 112” antes de tirarse á auga sen saber ben o que facer.

“Tíranse polo accidentado e, no canto dunha vítima, temos dúas”. “Se non hai socorrista,  primeiro chamar ao 112 e tirar un elemento de flotación e, se hai, non tirarme se non sei facer nada xa que afundirache ao estar nervioso”, subliñou para explicar que é necesario chamar a emerxencias para activar a cadea de auxilio existente nestes casos.