Uns setenta alumnos de centros do Bierzo que cursan lingua galega participan esta semana nun campamento no albergue xuvenil de As Sinas, en Vilanova, co obxectivo de impulsar a convivencia durante dous días nunha­ contorna natural privilexiada, onde os participantes gozan dun tempo de lecer, formación e dinamización cultural coa lingua galega como vehículo de expresión, aprendizaxe e relación.

O conselleiro de Cultura, Lingua e Xuventude, José López, visitou onte aos participantes desta iniciativa organizada no Programa de promoción do galego desenvolvido polo goberno de Castela e León e a Xunta nos territorios limítrofes. Neste senso, o representante autonómico puxo en valor o traballo feito desde o executivo galego ao abeiro do Pacto pola lingua “co obxectivo de impulsar e prestixiar o uso da galego en todos os ámbitos da sociedade e entre todos os grupos de idade, especialmente a xuventude”. Neste contexto, fixo referencia á proxección exterior da lingua galega noutras zonas nas que se fala ou existe un alto grao de comprensión. “É unha das liñas estratéxicas que se están a abordar nas mesas de traballo creadas para a renovación do Plan xeral de normalización da lingua galega”, puntualizou.