Os veciños de Veiga do Mar manifestan, en relación ao contido destes días na prensa por parte da Asociación de Veciños de Vilaxoán o seguinte: Consideramos que a Asociación de Veciños de Vilaxoán falta á verdade cando din que os veciños fixeramos unha protesta pola inseguridade vial respecto a toda a rúa, incluíndo a parada de autobús. Os veciños de Veiga do Mar sempre colaboramos con dita asociación para que solicitaran ao Concello de Vilagarcía un semáforo que regulase a entrada e saída da estrada do Freixo coa Avenida de Cambados, debido a que os camións supoñían un perigo para os viandantes ao coller a baixada e subida con moita velocidade.

A Asociación de Veciños de Vilaxoán minte cando di que nunca falou de retirar a parada de autobús de Rúa Jorge Martínez Padín. Nunha reunión recente, asegurounos aos veciños de Veiga do Mar e do Freixo que si que podería solicitar a retirada da parada de autobús por ser “perigosa e escura”.

Os veciños deste barrio defendemos que a parada de autobús leva máis de 50 ou 60 anos no mesmo sitio e nunca houbo ningún accidente ao respecto. Sendo unha parada necesaria para as persoas que alí habitan, xa que a maioría son persoas con pouca mobilidade e xa nunha idade avanzada que carecen de permiso de conducir e teñen que desprazarse á vila para poder ir aos bancos, médicos, etc.

Os veciños o que queremos é que se deixe de manipular aos nosos maiores cando lle convén á asociación e que sexan claros. Tamén queremos que convoquen aos interesados para que escoiten a nosa opinión e coñezan a verdade da zona, e non que convoquen por intereses partidistas duns poucos para tomar decisións que nos afectan a todos.

Os veciños esiximos á Asociación de Veciños de Vilaxoán que loiten polo ben común e que se deixen de plantexar situacións que non favorecen a boa convivencia, que pensen nas persoas que alí vivimos e que cada día teñen, e necesitan, coller ese autobús urbano para poder desprazarse.